Aqyarnıñ Rusiye yolbaşçısı Mihail Razvojayev bildirgenine köre, dronlarnıñ mayısnıñ 2-ne keçer gecesi şeerge qarşı ücümi bu yıl «eñ büyük kütleviy ücüm» oldı. Bu haber Telegram kanalında derc etildi.
«Arbiylerimiz deñizde çalıştı: Aqyarğa yaqınlaşqan 50-den ziyade uçucısız yoq etildi ve bir qaç deñiz dronı tüşürildi. Şeerde ya da deñizde zarar körgen bir obyekt yoq», – dep yazdı Razvojayev mayısnıñ 2-nde saba.
Razvojayevniñ fikirince, Ukrayina arbiyleri «tek yarımada sakinleriniñ degil, turistlerniñ de mayıs bayramlarını bozmağa» tırıştı.
Bunıñnen beraber, Ukrayina Sahte malümat ile küreş merkeziniñ reberi Andriy Kovalenko Telegram kanalında «Qırımnıñ askeriysizleştirilüvi» «Qara deñizde telükesizlikniñ müim bir qısmı» ola, Qırımnıñ arbiy obyektlerinde patlavlar ise «telükesizlik terkibidir».
Mayısnıñ 2-nde gece Qırım ve Aqyar uçucısızlarnıñ kütleviy ücümine oğradı, yerli Telegram kanalları patlav sesleri ve Rusiye Federatsiyası Ava mudafaasınıñ işi aqqında yazdı, Aqyarnıñ Rusiye yolbaşçısı Mihail Razvojayev saat 2:38-den 4:54-ke qadar devam etken ava telükesi aqqında haber etti.
«Krımskiy veter» Telegram kanalı abunecileriniñ malümatına esaslanıp, Kefe, Aqmescit, Sarabuz, Canköy, Saq ve Saq rayonı, Novofedorovka, Ermeni Bazar, Tarhan Qut ve Ulu Qol (Lukull) burunları, Acı Bolat (Uglovoye) ve Çalğarı (Krasnoye) köylerinde patlavlar aqqında bildirdi. Kaça, Belbek, Novofedorovka ve Sarabuz yaqınlarında Rusiye arbiy uçaq alanlarına qarşı ücüm aqqında haber etildi. Darbe neticeleri şimdilik belli degil.
Mayısnıñ 2-nde saba Rusiye Federatsiyasınıñ Mudafaa nazirligi Qırımda 89 ve Qara deñizde 23 tüşürilgen dron aqqında haber etti. Müessiseniñ malümatını başqa menbalar vastasınen tasdıqlamaq imkânsız ola. Ukrayina arbiyleri bu malümatnı şimdilik izaatlamadı.
2022 senesinden başlap yarımada aman-aman er kün uçucısız ve raketalarnıñ ücümine oğray, çoqusı alda Rusiye Federatsiyasınıñ Mudafaa nazirligi ya da Rusiye akimiyeti, bu malümat olsa da, arbiy obyektlerge darbe endirilgenini tasdıqlamay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.