Martnıñ 22-nde Qırımda tutulğan lvivli qorantanıñ advokatları bar, amma Rusiye uquq qoruyıcıları Tetâna Malâr, erkek qardaşı Valentın, oğlu Anatoliy Rossihin ve qızı Olga Begeyniñ apiske alınğanını gizlemege tırıştı. Bu aqta Qırımtatar Milliy Meclisiniñ reisi Refat Çubarov haber ete, dep bildire «Suspilne».
«Soy-sopları qayda ve ne alda olğanlarını bilmey edi. Bu bir afta sürdi. Pek telâşlı, çünki bizim tecribemiz, Qırımda repressiyalarğa oğrağanlarnıñ tecribesi, ilk künleri Rusiye cezacıları tutulğanlar qayda olğanını aytmasa, bu tek bir şeyni kstere: olarnı işkencege oğratıp, Rusiye cezacılarına kerek olğan şaatlıqlarnı talap ete», – dep qayd etti Çubarov.
Tutulğanlar «devlet hainliginde» qabaatlandı. Çubarov qanunsız şekilde tutulğanlarnıñ soy-soplarını böyle adiselerni aydınlatmalarına çağırdı.
«Rusiye cezacıları ne qadar cinayetçi olsa olsun, olar malümatnıñ aydınlatılmasına, açıq olmasına baqa, kim ve qayda olğanı aytılsa. Cezacılarnıñ soyadlarını aytıp olsaq, inanıñız, tecribemiz köstergeni kibi, insannı qurtarmaq mümkün, çünki onı daa az çekiştirecekler», – dedi Meclis reisi.
Qırımtatar resurs merkezi bildirgenine köre, Qırım ilhaqı vaqtında aq qorçalayıcılar 399 mabüsni qayd etti, olardan 241 qırımtatardır.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
