Rusiyeniñ nevbetteki ücümlerinden soñ Ukrayina prezidenti Volodımır Zelenskıy, Rusiyeni ateşni toqtatmaq ve muzakerelerge mecbur etecek basqı olmaq kerek, dep bildirdi.
"50 künden berli Rusiye, Amerikanıñ tam ve şartsız ateş toqtatılması teklifini körmemezlikke ura. Bizim tekliflerimiz de bar edi — eñ azından, grajdan infrastrukturalarına ücümlerden vazgeçüv ve kökte, deñizde ve yerde nisbeten uzun müddetli tınçlıq. Bütün buña Rusiye yañı ateş açuvları, ücümlernen cevap bere. Şunıñ içün diplomatiya içün küçlü bir itev kerek — Rusiyeni ateşni toqtatmaq ve muzakerelerge mecbur etecek basqı olmaq kerek", — dep yazdı o telegramda.
Onıñ aytqanına köre, sanktsiyalar ne qadar semereli olsa, Rusiyeniñ cenkni toqtatmaq içün o qadar da çoq stimulı olur, Ukrayina mudafaası ne qadar küçlü olsa, uzun müddetli telükesizlikni o qadar da tez kefil etmek mümkün.
Ukrayina Arbiy-deñiz quvetleriniñ ava quvetleri quralaynıñ 1-ne keçken gecesi Rusiye arbiyleri Ukrayinağa beş "İskander-M" ballistik raketa, em de 170 uçucısız uçaq ve diger tipli dronlarınen ücüm etti, dep bildirdi.
Rusiye arbiyleri çeşit silâ qullanıp, muntazam sürette Ukrayina regionlarına ücüm ete.
RF reberligi, Rusiye ordusı büyük cenk vaqtında Ukrayina şeerleri ve köyleriniñ grajdan infrastrukturalarına maqsatlı darbelerini endirip, ealini öldürgenini ve hastahaneler, mektepler, bala bağçaları, energetika ve suv teminatı obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıy ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
