Saqta «tüşken uçucısız parçaları alınğanı» içün Kuznetsov soqağında avtobuslarnıñ areketi toqtatıldı, dep bildirdi Saq şeeriniñ Rusiye memuriyet yolbaşçısı Yuliya Peredıbaylo.
«Tüşken uçucısız parçalarını toplav sebebinden ve ayrı bir emir kelgenine qadar Kuznetsov soqağında avtobuslar areket etmeycek. Stroitelnaya, Starikov, Plâjnaya, Pionerskaya-Bolnitsa soqaqlarından ketecek. Qaytqanda ise 9 Geroyev, Starikov, Stroitelnaya-Himposelok soqaqlarından keçecek. Uçucısız parçaları tapılsa, 112 hızmetine telefon etiñiz», – dep aytıla haberde.
«Mash na volne» Rusiye Telegram kanalı dron parçalarını toplav haberinde video ve foto derc ete.
Mayısnıñ 2-nde gece Qırım ve Aqyar uçucısızlarnıñ kütleviy ücümine oğradı, yerli Telegram kanalları patlav sesleri ve Rusiye Federatsiyası Ava mudafaasınıñ işi aqqında yazdı, Aqyarnıñ Rusiye yolbaşçısı Mihail Razvojayev saat 2:38-den 4:54-ke qadar devam etken ava telükesi aqqında haber etti.
«Krımskiy veter» Telegram kanalı abunecileriniñ malümatına esaslanıp, Kefe, Aqmescit, Sarabuz, Canköy, Saq ve Saq rayonı, Novofedorovka, Ermeni Bazar, Tarhan Qut ve Ulu Qol (Lukull) burunları, Acı Bolat (Uglovoye) ve Çalğarı (Krasnoye) köylerinde patlavlar aqqında bildirdi. Kaça, Belbek, Novofedorovka ve Sarabuz yaqınlarında Rusiye arbiy uçaq alanlarına qarşı ücüm aqqında haber etildi. Darbe neticeleri şimdilik belli degil.
Mayısnıñ 2-nde saba Rusiye Federatsiyasınıñ Mudafaa nazirligi Qırımda 89 ve Qara deñizde 23 tüşürilgen dron aqqında haber etti. Müessiseniñ malümatını başqa menbalar vastasınen tasdıqlamaq imkânsız ola. Ukrayina arbiyleri bu malümatnı şimdilik izaatlamadı.
2022 senesinden başlap yarımada aman-aman er kün uçucısız ve raketalarnıñ ücümine oğray, çoqusı alda Rusiye Federatsiyasınıñ Mudafaa nazirligi ya da Rusiye akimiyeti, bu malümat olsa da, arbiy obyektlerge darbe endirilgenini tasdıqlamay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz
