Ukrayina prezidentiniñ Qırım Muhtar Cumhuriyeti temsilciligi Rusiye mahkemesiniñ 11-den 14 yılğa qadar azatlıqtan marum etilgen Cankoyli «qırımlı musulmanlar davasınıñ» mabüslerine çıqarğan ükmüni «halqara gumanitar uquq bozuluvınıñ örnegi» dep adlandırdı. Bu haber müessiseniñ içtimaiy ağında derc etildi.
«Bir çoq protsessual bozuvlar arasında advokatlar tintüvlerniñ qanunsızlığına, delillerniñ olmamasına, operativ qıdıruv faaliyet malümatını olarnı kerekli şekilde cedvelge almağan alda qullanuvğa, imaye aqqınıñ bozuluvı ve qorçalayıcınıñ iştiraki aqqınıñ bozulmasına diqqat ayırdılar. Qabaatlanğanlar olarnı tek diniy işançları ve faal vatandaşlıq pozitsiyası içün taqip etilgenlerini qayd ettiler», – dep qayd etile haberde.
Ukrayina prezidentiniñ Qırım Muhtar Cumhuriyeti temsilciligi bu ükümni takbih etip, halqara toplulıqnı «işğal etilgen Qırımda insan aqlarınıñ bozuluvına cevap bermege», Rusiyege siyasiy ve sanktsiya basqısını quvetleştirmege çağırdı.
Rostov-na-Donu şeerindeki Cenübiy okrugınıñ arbiy mahkemesi «Hizb ut-Tahrir» davasınıñ ekinci Canköy gruppasınıñ mabüslerini 11 yıldan 14 yılğa qadar apis cezasına maküm etti, dep haber ete «Qırım birdemligi».
Canköyniñ 69 yaşındaki sakini, ev tehnikasınıñ tamircisi Halil Mambetov, 55 yaşındaki iş adamı Refat Seydametovğa üküm çıqarıldı. Olarnı 14 yılğa apiske aldılar, dört yıl apishanede, qalğanını ise sert rejimli cezahanede keçirecekler.
Aynı ceza 41 yaşındaki qurucı Osman Abdurazakovğa, 51 yaşındaki qurucı Löman Zekeriyayevge, 31 yaşındaki tölev terminallarınıñ tamiri mütehassısı Ayder Asanovğa ve 39 yaşındaki ev tehnikası ustası Ekrem Kroşqa berildi.
Tek Ayder Asanovnı makeme 11 yılğa azatlıqtan marum etti, ilk üç yılını apiste, qalğan müddetini sert rejimli cecahanede keçirecek ve soñra bir yıl azatlıq sıñırlavı olacaq.
Qırımtatarlar «Hizb ut-Tahrir» teşkilâtınıñ faaliyetinde iştirak etüv ve akimiyetni zorbalıqnen zapt etmege azırlıq yapuvınen qabaatlı tanıldı.
«Musulmanlarnıñ dini içün ağır cinayetlerde qabaatlanğanları meni pek raatsızlay. Dua etken, camini tamir etken, İslâmnı muzakere etken insanlar 17 yıl apis cezasını alalar», — dedi makeme oturışına kelgen faal Eskender Celâlov.
2023 senesi qara qış ayınıñ 24-nde saba Canköy rayonında Rusiye uquq qoruyıcıları qırımtatarlarnıñ evlerinde tintüv keçirdi: Nemse Canköy (Blijnegorodskoye) köyünde Ekrem Kroş, Timofeyevka köyünde Ayder Asanov ve Refat Seydametov, Çoqraqlı Şeyh Eli köyünde (Dneprovka) Osman Abdurazakov, Canköyde Leman Zekiryayev ve Halil Mambetovnıñ evini.
Ekrem Kroşnıñ ömür arqadaşı Amideniñ «Qırım birdemligi» cemaat teşkilâtına bildirgenine köre, Qırım şimalinde tutulğan qırımtatarlar «terrorizmde» qabaatlana bile. Qırımlı musulmanlarğa mustaqil advokatlar alınmay, dep haber etilgen edi.
Qırımnıñ Rusiye yolbaşçısı Sergey Aksenov qara qış ayınıñ 24-nde saba qırımtatarlarnıñ evlerinde keçirilgen tintüvlerni izaatladı. Onıñ aytqanına köre, uquq qoruyıcılar «Ukrayına ile alâqaları» bar olğanında qabaatlanğan altı vatandaşnı tuttı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
