Ukrayina prezidenti Volodımır Zelenskıy bildirgenine köre, Rusiye arbiyleri aprelniñ 30-na keçer gecesi yüzden ziyade darbe uçucısızını qullanıp, Ukrayinağa ücüm etti, o, Rusiyege qarşı basqını quvetleştirmege çağırdı.
«Harkiv, Dnipro, Dobropillâ, diger şeer ve qasabalarımız. 100-den çoq Rusiye darbe uçucısızı bu gece, afta başından 375 darbe uçucısızı, 190-ı – Shahed», – dep qayd etti devlet yolbaşçısı Telegramda.
«Rusiye dronları bütün saba Ukrayina üstünde kökte uçtı. Ve bu er kün ola. Şunıñ içün bizge Rusiyege basqı kerek, çalışacaq küçlü qoşma sanktsiyalar kerek. Tek sözler ya da iqna etüv tırışuvları degil, basqı Rusiyeni ateşni toqtatmağa ve cenkni bitirmege mecbur etmeli. ABD, Avropa, dünyada cenkke yer olmağanını tüşüngen er kes basqı yapmalı. «Bizge halqımıznı qorçalamaq içün Rusiye ava terrorını imkânsız yapacaq qoşma ava mudafaa sistemaları kerek», – dep qoştı o.
Harkivde aqşam Rusiye darbesi neticesinde, soñki malümatqa köre, 47 adam yaralandı, olarnıñ arasında eki bala bar: 16 yaşında oğlan ve 5 yaşında qız, em de 24 yaşında ağır ayaqlı qadın. Darbe neticesinde mesken yerleri, çoq daireli evler, hastahane ve mektep zarar kördi.
Dniproda aqşam ücümi neticesinde bir adam elâk oldı, daa birisi yaralandı, vatandaş infrastrukturası obyektine zarar keldi.
Dobropillâda, Ukrayina prezidentiniñ aytqanına köre, Rusiye arbiyleri şahta binasına urdı, avtobuslarğa ve maşinalarğa zarar keldi, bir insan yaralandı.
Rusiye arbiyleri Ukrayina regionlarına çeşit silâ qullanıp muntazam surette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, tınç ealini öldürgenine, hastahaneler, mektepler, bala bağçaları, energetika ve suv teminlevi obyektlerini yoq etkenine red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıy ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
